(تابع) خطاب الرئيس أنور السادات، أمام اجتماع اللجنة المركزية للاتحاد الاشتراكي ومجلس الشعب

          أنا بااركز على هذه النقطة لأن هي دي الحلقة الأساسية في صمودنا وفي قوتنا الذاتية. وعلشان كده أنا حريص إنه باستمرار هذه الحلقة الأساسية لازم تدعم ولازم تتأصل باستمرار. مرت ست سنوات، وزي ما قلت دي حرب الست أيام اللي أنهت الدنيا خلاص، وأنهت مشاكل إسرائيل وخلصت على العرب ومفيش معركة تاني. طيب بدل الست ايام مرت ست سنين ولم تستسلم الإرادة العربية، القوة الذاتية المصرية، الأصالة المصرية، الإرادة المصرية وقفت وأثبتت ذاتها وأثبتتها إلى هذه اللحظة زي ما قلت إلى أن تقوم الساعة إن شاء الله.

          إلى جانب هذا ماكانتش دي هي القوة الذاتية بس، إنما ده زي ما قلت أهم حلقة قي قوتنا الذاتية لازم نحرص عليها ولازم زي ما قلت ننميها ونأصلها لأن هي دي روح شعبنا ما حدش يقدر أبداً يعمل ضد روح شعبنا أو يفرض شئ ضد إرادة شعبنا أبداً. دي إرادة زي ما قلت للرجل العادي، ابن البلد في الشارع، والفلاح والعامل وكل إنسان، دي إرادته المترسبة فيه من صمود 7000 سنة. لكن مش دي بس القوة الذاتية، لا جنبها القوة المادية. عملنا إيه في الست سنين اللي فاتت علشان ندعم القوة الذاتية المصرية اللي هي سند أساسي في المواجهة اللي إحنا فيها النهاردة.

          أنا عايز أدي شوية أرقام، لأن الأرقام لا تخطئ في الأمور دي، الأرقام أحسن لأنها هي اللي بتدي الصورة بدل الكلام على قواتنا المسلحة إلى هذه السنة، منذ سنة 67 حتى موازنة 1973 إجمالي الإنفاق بعد العدوان بما فيه اتفاقيات التسليح 4254 مليون جنيه. 4254 مليون جنيه الكلام ده داخل أمام مجلس الشعب وشاف الميزانية وأرقام حية. ده القوات المسلحة، لبناء قوات ذاتية.

          قيمة الإنتاج الكلي في الاقتصاد القومي، في 66 كان الإنتاج كله 66 - 67 كان 4375 مليون جنيه، السنة دي 73 المستهدف 6306 مليون جنيه، زيادة 1831 مليون بنسبة 40 %، أي بمتوسط 6.1 من 67 لغاية النهاردة. ده في اقتصادنا القومي، قيمة الإنتاج الكلي.

          الدخل القومي، سنة 67 كان 2180 مليون جنيه، السنة دي 3078 مليون جنيه، زيادة 898 مليون، الزيادة بنسبة 40 % في الست سنين، من 67 لغاية 73.

          باادي أرقام وزي ما قلت الأرقام لا تخطئ. النقل والمواصلات والتجارة والمال والخدمات إنما أنا عايز آجي. حجم العمالة لسنة 66/ 67 لأن دايماً واخد 67 كمقارنة بـ 73 عشان الست سنين. حجم العمالة كان 7.634.000 مشتغل كان 67، سنة 73 أصبح 8.865.000، فرق الزيادة 1.231.000 بنسبة 16 % فرق العمالة بين 67/ 73. كل ده بيوري البلد ماشية وبتنتج وبتبني واللا لا. نيجي نشوف الاستثمارات. كلنا عارفين القوات المسلحة بتاخذ 700 مليون جنيه، في السنة هل وقفت التنمية؟ هل وقفت الاستثمارات؟. برضه الأرقام أحسن حاجة بدل الكلام لأنها موجودة في الميزانية وأمام مجلس الشعب وبنحاسب عليها الحكومة.

<11>