( تابع ) خطاب الرئيس جمال عبدالناصر في افتتاح الدورة الثالثة للمؤتمر القومي العام للاتحاد الاشتراكي العربي

          إحنا وإسرائيل بنتفق على مين اللي حايرجع اللاجئين.

          طبعاً بالنسبة لموضوع القدس، أمريكا هي الدولة اللي وقفت في الأمم المتحدة ولم تعترض على الإجراءات التي تتخذها إسرائيل في القدس.. كل الدول اعترضت.

          إذن موقف الولايات المتحدة الأمريكية موقف أمريكا يمكن اتغير في الأسلوب، في الأول كانوا جامدين خالص وبكل برود بالنسبة لينا.

          دلوقتي الحقيقة الأسلوب فيه تغيير وفيه كلام وفيه أخذ وفيه عطا. لكن بنطلع في الأخر بالمحصلة الموقف إيه؟

          الموقف هو استجابة لكل مطالب إسرائيل.

          إيه مذكرة المشروع اللي قدمته أمريكا من 13 نقطة؟

          لما تمسك كلام وزير خارجية إسرائيل ايبان بنلاقيه هو كلام ايبان أخذوه حطوه في 13 نقطة وقدموه للاتحاد السوفيتي على إن ده رأيهم في حل القضية.

          طبعاً هذا الموقف يشجع إسرائيل بل هو المشجع الأساسي لإسرائيل في استمرارها في العدوان على أراضينا في رفضها للانسحاب من أراضينا.

          حينما نتكلم أيضاً عن الموقف الدولي، فالجو الدولي بعد ما اتكلمنا عن الاتحاد السوفيتي واتكلمنا على موقف أمريكا.

برضه قبل ما أسيب موقف أمريكا فيه ناس بيقولوا إن إحنا ليه مابنصلحش علاقتنا مع أمريكا، مابنحسنش علاقتنا الدبلوماسية مع أمريكا، مابنعدلش علاقتنا مع أمريكا.

فيه ناس هنا وأنا عارف، عارف مين هم وعارف بعض الناس اللي اتكلموا.

          ويمكن ده هو اللي مزعل الأمريكان ومخليهم يعني وخدين هذا الموقف.

          الحقيقة إحنا عندنا مثل في هذا، الملك حسين عنده علاقات سياسية مع أمريكا وراح زار أمريكا وقابل رؤساء أمريكا ثلاث مرات واتكلم معاهم، عملوا إيه؟ عملوا إيه للأردن؟ والضفة الغربية كلها محتلة. بالعكس مفيش أي شئ.

<24>