(تابع) خطاب الرئيس جمال عبدالناصر في كفر الدوار

          في الستاشر سنة اللي فاتت حصلنا مكاسب كثيرة، ولكن مش هو ده أملنا. أملنا لا ينتهي عند ما وصلنا إليه، أملنا يمتد إلى ما نتمنى وإلى ما نريد أن نصل اليه، أملنا يمتد إلى حياة أحسن وإلى حياة أفضل وإلى مجتمع ترفرف عليه الرفاهية، أملنا يمتد إلى أن نجد فرص عمل لكل واحد ونجد مقعد في المدارس لكل طالب مكنش ده موجود، لكن كل يوم بنجد إن جزء من أملنا تحقق.

          اللي أنا بدي أقوله إن إحنا بالعمل بس نقدر نحقق الآمال العريضة اللي عاوزينها، مش لنفسنا وبس، الواحد عاوز آمال للناس كلها، وأنا جي في القطر الصبح من القاهرة إلى كفر الدوار، وأنا قاعد وشايف الناس في الفلاحين على جانبي الطريق بيشتغلوا في الغيطان، الراجل بيشتغل هو ومراته ومعاه ولاده، واللي بيشتغل حافي وقاعد تحت الشمس، وبيشتغل زي ما إحنا عارفين مهواش حتى لابس الجلابية، كل دول إحنا عاوزين نحسن حالتهم وإحنا محناش بلد غني، إحنا بلد الحقيقة عندنا مشكلتين، ثروتنا محدودة وعندنا زيادة في السكان مليون كل سنة، إزاي نوفق بين الحاجتين الصعبتين الثروة المحدودة والزيادة في السكان من 800 ألف إلى مليون في كل سنة. سبيلنا الوحيد إن إحنا فعلاً نرتقي بمجتمعنا وإن إحنا نحقق آمال كل فرد من أبناء مجتمعنا إن إحنا نعمل عمل مستمر ولا نهمل بأي شكل من الأشكال ولا نهدر أي طاقة من الطاقات، لأن الواحد فينا مهواش مسئول عن نفسه وبس، هو مسئول عن نفسه وعن أبنائه، لأن الإنتاج اللي بيطلع من كل عامل جزء منه بيروح أجر للعمال، وجزء منه بييجي علشان يبقى فائض علشان نستثمره في إقامة مصانع جديدة ونشغل فيها عمال جداد ونطلع إنتاج. وهكذا تتكرر العملية باستمرار ونستطيع أن نستوعب المليون اللي بيزيدوا علينا كل سنة، ونستطيع أن نحسن من حالتنا اللي كانت سيئة نتيجة الاستعمار والإقطاع واستغلال رأس المال. هناك حاجات كثير في طاقتنا إن إحنا نعملها، وهناك إمكانيات لعمل مشروعات محلية، ومشاكل. النهاردة سمعت من المحافظ لما بيتكلم عن الإسكان، وأنا قبل ما أجي هنا سمعت يمكن عن مشاكل الإسكان، مشكلة الإسكان هي مش مشكلة موجودة هنا، مشكلة موجودة في كل مكان، لأن الهجرة من الريف إلى المدينة بتزداد باستمرار لدرجة إن القاهرة النهاردة بقيت تقريباً بيبقى فيها بالنهار 5 مليون، جزء كبير بييجي منه برضه إلى القاهرة، وطبعاً من الصعب إن إحنا نمشي ونستثمر في الإسكان أموال طائلة، لأن الاستثمار في الإسكان بيكون محدود، لأن إحنا عاوزين نستثمر في الصناعة علشان نجيب إنتاج أو في الزراعة علشان نجيب إنتاج علشان يبقى فيه فايض من قيمة الإنتاج نستطيع أن نستثمره بعد هذا في الإسكان أو في الإنتاج أو في الخدمات، وسمعت يمكن عن شكاوى من اللايحة اللي اتكلم عليها أحمد فهيم النهاردة، وأنا سألت هل فعلاً فيه شكاوى وطلبت من وزير الصناعة ووزير العمل يشوفوا هذا الموضوع. إحنا بنتطور باستمرار، أول ما جينا في أول الثورة طلعنا قانون الفصل التعسفي ومكنش فيه اتحاد لنقابات العمال، عملنا اتحادات لنقابات العمال، وبنقول إن إحنا حققنا حاجات كثيرة جداً، وفيه حاجات لسه علينا إن إحنا نحققها، لابد إن إحنا نحقق الحاجات المطلوبة، ولابد إن إحنا نحقق الآمال اللي بيبص عليها كل انسان، وتحقيق هذا كان هدف كبير من أهدافنا منذ قامت الثورة. من أهداف الثورة الستة إقامة عدالة اجتماعية. وأنا لما رحت حلوان واتكلمت في عمال حلوان، وكان هناك قبل ما أروح موضوع صرف الأرباح للعمال. موضوع صرف الأرباح

<8>